పసిడి మళ్లీ పరుగు.. రూ.1.50 లక్షల మార్కు దాటిన బంగారం

గత కొద్ది రోజులుగా తగ్గుముఖం పట్టిన బంగారం ధరలు మళ్లీ ఒక్కసారిగా పుంజుకున్నాయి. శుక్రవారం దేశ రాజధాని ఢిల్లీ బులియన్ మార్కెట్లో 10 గ్రాముల 24 క్యారెట్ల బంగారం ధర రూ.3,300 మేర పెరిగి రూ.1,50,800కి చేరింది. దీంతో పసిడి ధర మరోసారి కీలకమైన రూ.1.50 లక్షల మార్కును దాటింది. అంతకుముందు రోజు ఈ ధర రూ.1,47,500 వద్ద ముగిసింది.

బంగారంతో పాటు వెండి ధర కూడా భారీగా పెరిగింది. కిలో వెండి ధర రూ.5,000 వృద్ధి చెంది రూ.2,45,000కు చేరుకుంది. అంతర్జాతీయ మార్కెట్లలోని సానుకూల ధోరణులు దేశీయ ధరలపై ప్రభావం చూపాయి. అమెరికా ఫెడరల్ రిజర్వ్ వడ్డీ రేట్లను దూకుడుగా పెంచకపోవచ్చనే అంచనాలు బలపడటంతో, పెట్టుబడిదారుల తిరిగి పసిడి వైపు మొగ్గుచూపుతున్నారు. అంతర్జాతీయ మార్కెట్లో ఔన్సు బంగారం ధర 57 డాలర్లు పెరిగి 4,181 డాలర్ల వద్ద ట్రేడ్ అవుతోంది.

గత కొన్ని వారాలుగా బంగారం ధరలు గరిష్ఠ స్థాయిల నుంచి దాదాపు 10 శాతం మేర తగ్గిన విషయం తెలిసిందే. దీంతో కొందరు పెట్టుబడిదారులు లాభాల స్వీకరణకు, మరికొందరు ధరలు ఇంకా తగ్గుతాయనే అంచనాలతో విక్రయాలకు ప్రాధాన్యత ఇచ్చారు. అయితే, అమెరికాలో ద్రవ్యోల్బణం అదుపులోకి వస్తోందన్న సంకేతాలతో పాటు డాలర్ బలహీనపడటం వంటి అంశాలు పసిడి ధరలకు మళ్లీ ఊతమిచ్చాయి. ఫలితంగా సురక్షిత పెట్టుబడిగా భావించే బంగారానికి డిమాండ్ పెరిగింది.

రాబోయే రోజుల్లో బంగారం ధరల గమనం అంతర్జాతీయ పరిణామాలపైనే ఆధారపడి ఉంటుంది. ముఖ్యంగా జూలై 8న విడుదలయ్యే అమెరికా ఫెడరల్ రిజర్వ్ సమావేశపు 'మినిట్స్' అత్యంత కీలకం కానున్నాయి. ఈ నివేదిక వెలువడిన తర్వాత బులియన్ మార్కెట్‌కు ఒక స్పష్టమైన దిశానిర్దేశం లభించవచ్చని మార్కెట్ విశ్లేషకులు అంచనా వేస్తున్నారు.